Thursday, November 17, 2022

ഈരാറ്റുപേട്ട ഉപജില്ലാ കലോത്സവം - റിസല്‍ട്ട്

വലിയകുമാരമംഗലം സെന്റ് പോള്‍സ് ഹയര്‍ സെക്കന്‍ഡറി സ്കൂളില്‍ നടന്ന ഈരാറ്റുപേട്ട ഉപജില്ലാ കലോത്സവത്തിന്റെ റിസല്‍ട്ട് ചുവടെ :

(എല്ലാ മത്സര ഫലങ്ങളും ചുവടെ ചേര്‍ത്തിരിക്കുന്നു)














Monday, March 8, 2021

കോവിഡ് വാക്സിനേഷന്‍ - ഓണ്‍ലൈന്‍ രജിസ്ട്രേഷന്‍ വളരെ എളുപ്പത്തില്‍ ഇങ്ങനെ ചെയ്യാം..

      അറുപതു വയസിനു മുകളിലുള്ള മുതിര്‍ന്ന പൗരന്മാര്‍ക്ക് കൊറോണ വൈറസിനെതിരേയുള്ള വാക്സിന്‍ നല്കിത്തുടങ്ങി. വാക്സിനേഷന്‍ കേന്ദ്രങ്ങളില്‍ തിരിച്ചറിയല്‍ രേഖകളുമായി എത്തി വാക്സിന്‍ സ്വീകരിക്കാനുള്ള സൗകര്യമുണ്ടെങ്കിലും തിരക്കും സമയ നഷ്ടവും ഒഴിവാക്കാന്‍ മുന്‍കൂട്ടി രജിസ്റ്റര്‍ ചെയ്തിട്ട് പോകുന്നതാണ് നല്ലത്.ഒരു സ്മാര്‍ട്ട് ഫോണ്‍ ഉണ്ടെങ്കില്‍ വളരെ എളുപ്പത്തില്‍ ആര്‍ക്കും ഇത് ചെയ്യാന്‍ സാധിക്കും.
Step 1
കോവിന്‍ വെബ്സൈറ്റില്‍ പ്രവേശിക്കുക - www.cowin.gov.in
Register Yourself -ല്‍ ക്ലിക്ക് ചെയ്യുക.
മൊബൈല്‍ നമ്പര്‍ നല്‍കുക. OTP ലഭിക്കാന്‍ ക്ലിക്ക് ചെയ്യുക. മൊബൈലില്‍ SMS ആയി ലഭിക്കുന്ന OTP നല്‍കുക. Varify ചെയ്യുക.
രജിസ്ട്രേഷനുള്ള പേജ് ലഭിക്കും.

 Step 2

രജിസ്ട്രേഷന്‍ പേജില്‍ ആവശ്യമായ വിവരങ്ങള്‍ നല്‍കുക :
ഏത് ഫോട്ടോ ID പ്രൂഫാണ് നല്‍കുന്നത് (ആധാര്‍ കാര്‍ഡ്, വോട്ടേഴ്സ് ഐ.ഡി. കാര്‍ഡ്,..),
ആ കാര്‍ഡിന്റെ നമ്പര്‍,
വ്യക്തിയുടെ പേര് (ഐ.ഡി. കാര്‍ഡിലേതുപോലെ തന്നെ നല്‍കുക),
ജനിച്ച വര്‍ഷം,
Male/Female,
....തുടങ്ങിയ വിവരങ്ങള്‍ നല്‍കുക.



രജിസ്റ്റര്‍ ബട്ടണ്‍ അമര്‍ത്തി രജിസ്ട്രേഷന്‍ പൂര്‍ത്തിയാക്കുക. Beneficiary Registered Successfully എന്ന സന്ദേശം സ്ക്രീനില്‍ കാണാം.
Account Details പേജ് ഇപ്പോള്‍ കാണാന്‍ സാധിക്കും. Add more -ല്‍ ക്ലിക്ക് ചെയ്ത് അടുത്ത വ്യക്തിയെ രജിസ്റ്റര്‍ ചെയ്യാം. ഒരു മൊബൈല്‍ നമ്പരില്‍ 4 വ്യക്തികളെ രജിസ്റ്റര്‍ ചെയ്യാനാകും.



Step 3
Booking Appointment for Vaccination
Account Details പേജില്‍ ഏറ്റവും വലത്തുള്ള Action എന്ന തലക്കെട്ടിനു ചുവടെ ഒരു കലണ്ടറിന്റെ ചിഹ്നംപോലെ കാണിച്ചിരിക്കുന്നത് Appointment Shedule ചെയ്യുവാനുള്ള ബട്ടനാണ്. അല്ലെങ്കില്‍ Shedule Appointment ബട്ടനും ചുവടെ കാണാം. ക്ലിക്ക് ചെയ്യുമ്പോള്‍ വരുന്ന ഭാഗത്ത് - State, District, Block, Pincode (ഏത് ബ്ലോക്ക് സെലക്ട് ചെയ്തോ ആ ബ്ലോക്കിലെ പിന്‍കോഡുകളാണ് ഇവിടെ ലഭിക്കുക) നല്‍കിക്കഴിയുമ്പോള്‍, ആ പ്രദേശത്തെ വാക്സിനേഷന്‍ സെന്ററുകള്‍  കാണാം.
സെന്റര്‍ തിരഞ്ഞെടുക്കുക. ദിവസവും സമയവും (FN or AN) നോക്കി വാക്സിനേഷനായി ബുക്ക് ചെയ്യുക. ബുക്കിംഗ് പൂര്‍ത്തിയായാല്‍ ആ വിവരങ്ങള്‍ ആവശ്യമെങ്കില്‍ ഡൗണ്‍ലോഡ് ചെയ്തെടുക്കാം. ബുക്ക് ചെയ്യാനായില്ലെങ്കില്‍, പിന്നീട്, ആദ്യം പറഞ്ഞതുപോലെ മൊബൈല്‍ നമ്പരും OTP-യും നല്‍കി വെബ്സൈറ്റില്‍ പ്രവേശിക്കുമ്പോള്‍ Account Details പേജിലേക്കാണ് പ്രവേശിക്കുക. പുതിയ അംഗങ്ങളെ രജിസ്റ്റര്‍ ചെയ്യുകയോ വാക്സിനേഷന്‍ ബുക്കിംഗ് നടത്തുകയോ ചെയ്യാം. റീ ഷെഡ്യൂള്‍ ചെയ്യാനും ഡെലിറ്റ് ചെയ്യാനുമൊക്കെയുള്ള ഓപ്ഷസും ഇവിടെയുണ്ട്.
 




Wednesday, January 27, 2021

ഫാ.ജോസഫ് വാതല്ലൂര്‍ CMI-യുടെ സംസ്കാരം വെള്ളിയാഴ്ച്ച പൂഞ്ഞാര്‍ ആശ്രമത്തില്‍..


       പൂഞ്ഞാർ സെന്റ് ആന്റണീസ് സ്കൂളിന്റെ മുൻ ഹെഡ്മാസ്റ്ററും സി.എം.ഐ. സഭയുടെ കോട്ടയം സെന്റ് ജോസഫ് പ്രവിശ്യാ അംഗവുമായ ഫാ. ജോസഫ് വാതല്ലൂർ CMl (ജോസഫ് അച്ചൻ - 78) അമേരിക്കയിൽ അജപാലന ശുശ്രൂഷയിൽ ആയിരിക്കെ കോവിഡ് ബാധിച്ച് നിര്യാതനായി.  അമേരിക്കയിലെ സാൻ ആൻജലോ തിരുഹൃദയ കത്തീഡ്രൽ ദേവാലയത്തിൽ  മൃതദേഹം പൊതുദർശനത്തിന് വയ്ക്കുകയും തുടർന്ന് സാൻ ആൻജലോ രൂപതയുടെ മെത്രാൻ, ബിഷപ്പ് മൈക്കിൾ സിസ്സിന്റെ മുഖ്യകാർമികത്വത്തിൽ പരേതന് വേണ്ടി വിശുദ്ധ കുർബാന അർപ്പിക്കുകയും ചെയ്തു. വി. കുർബാനയ്ക്ക് ശേഷം മൃതദേഹം ദഹിപ്പിച്ചു.
         ജോസഫ് അച്ചന്റെ സംസ്കാര ചടങ്ങുകള്‍ 2021 ജനുവരി 29, വെള്ളിയാഴ്ച്ച പൂഞ്ഞാര്‍ ചെറുപുഷ്പാശ്രമ ദൈവാലയത്തില്‍ നടക്കും. ജനുവരി 28, വ്യാഴാഴ്ച്ച വൈകിട്ട് 5 മുതല്‍ 8 വരെയും വെള്ളിയാഴ്ച്ച വെളുപ്പിന് മുതലും പൊതുദര്‍ശനം ഉണ്ടായിരിക്കും. വെള്ളിയാഴ്ച്ച രാവിലെ  9-ന് വി. കുര്‍ബാനയോടെ സംസ്കാര ശുശ്രൂഷകള്‍ ആരംഭിക്കും. 
 
സംസ്കാര ശുശ്രൂഷകളുടെ ലൈവ് 
വെള്ളിയാഴ്ച്ച രാവിലെ 7.30 മുതല്‍ 
ചുവടെയുള്ള ലിങ്കില്‍ ലഭ്യമാകും.
 

          പൂഞ്ഞാറുമായി ജോസഫ് അച്ചന് പ്രത്യേക അടുപ്പമുണ്ടായിരുന്നു. പൂഞ്ഞാർ ചെറുപുഷ്പാശ്രമ പ്രിയോർ, സെന്റ് ആന്റണീസ് സ്കൂളിന്റെ മാനേജർ, ഹെഡ്മാസ്റ്റർ തുടങ്ങിയ നിലകളിൽ ദീർഘനാൾ സേവനം അനുഷ്ഠിച്ചിട്ടുള്ള ജോസഫ് അച്ചൻ പൂഞ്ഞാറുകാർക്ക് പ്രിയങ്കരനായിരുന്നു. SSLC പരീക്ഷയിൽ മികച്ച വിജയം നേടുന്ന കുട്ടികൾക്കായി നിരവധി സ്കോളർഷിപ്പുകൾ അച്ചൻ ഏർപ്പെടുത്തിയിട്ടുണ്ട്. ശുശ്രൂഷകള്‍ക്കായി വിദേശത്തേക്ക് പോകേണ്ടിവന്നെങ്കിലും പൂഞ്ഞാറുമായുള്ള സ്നേഹബന്ധം തുടർന്ന ജോസഫ് അച്ചന്റെ സഹായത്താലാണ്, ഏതാനും മാസങ്ങൾക്ക് മുൻപ്, പൂഞ്ഞാർ സെന്റ് ആന്റണീസ് എൽ.പി. സ്കൂളിലെ കുട്ടികൾക്കായി മൾട്ടിമീഡിയ റൂമും പുതിയ പാചകപ്പുരയും നിർമ്മിച്ചത്.

          പാലാ രൂപതയിലെ തോടനാൽ ഇടവകയിൽ പരേതരായ ജോസഫ്-റോസമ്മ ദമ്പതികളുടെ മകനായി 1942 ജനുവരി 16-നാണ് അച്ചന്‍ ജനിച്ചത്. 1974 ഏപ്രിൽ 16-ന് പൗരോഹിത്യം സ്വീകരിച്ചു. പൂഞ്ഞാർ ലിറ്റിൽ ഫ്ലവർ ആശ്രമ പ്രിയോർ, പൂഞ്ഞാർ സെന്റ് ആന്റണീസ് സ്കൂൾ മാനേജർ, ഹെഡ്മാസ്റ്റർ, വാഴക്കുളം ഇൻഫെന്റ് ജീസസ് ഹൈസ്കൂൾ  ഹെഡ്മാസ്റ്റർ, ഗുജറാത്തിൽ ഭവനഗർ വെരാവൽ വികാരി, പ്രിൻസിപ്പൽ എന്നീ നിലകളിലും, ദീപിക കൊച്ചേട്ടന്റെ അസിസ്റ്റന്റ് ആയും, കൂത്താട്ടുകുളം ആശ്രമാംഗമായും സേവനം ചെയ്തിട്ടുണ്ട്. അമേരിക്കയിലെ ടെക്സസിൽ ഇടവക വികാരിയായി സേവനം ചെയ്തു വരികയായിരുന്നു. ഛാന്ദാ പ്രവിശ്യയിലെ ഫാദർ മാത്യു വാതല്ലൂർ സി.എം.ഐ., തോമസ്, മാത്യു (ന്യൂയോർക്), ഡോ. ജോൺ ജോസഫ് (കാരിത്താസ് കോട്ടയം) സിസ്റ്റർ ജോസലിറ്റ, സിസ്റ്റർ മരിയറ്റ, സിസ്റ്റർ സലോമി എന്നിവർ സഹോദരങ്ങളാണ്.

Sunday, October 11, 2020

പൊതുവിദ്യാഭ്യാസ മേഖലയിൽ പൂഞ്ഞാർ നിയോജകമണ്ഡലം സമ്പൂർണ്ണ ഡിജിറ്റൽ..

പൂഞ്ഞാർ  : വിദ്യാഭ്യാസ മേഖലയിൽ  പൂഞ്ഞാർ നിയോജകമണ്ഡലത്തിലെ എല്ലാ പൊതു വിദ്യാലയങ്ങളും പൂർണ്ണമായി ഡിജിറ്റലായതിന്റെ പ്രഖ്യാപനം പി. സി. ജോർജ് എം.എൽ.എ. നടത്തി. കേരളം സമ്പൂർണ്ണ ഡിജിറ്റലാകുന്നതിൻ്റെ ഔദ്യോഗിക പ്രഖ്യാപനം മുഖ്യമന്ത്രി പിണറായി വിജയൻ ഓൺലൈനായി നിർവ്വഹിച്ച സമയത്തുതന്നെ പൂഞ്ഞാർ സെന്റ് ആന്റണിസ് ഹയർ സെക്കന്ററി സ്കൂളിൽ  ചേർന്ന യോഗത്തിൽ നിയോജക മണ്ഡലതല പ്രഖ്യാപനം എം.ൽ.എ. നടത്തുകയായിരുന്നു. 
സ്കൂൾ മാനേജർ ഫാ. ചാണ്ടി കിഴക്കയിൽ CMI അധ്യക്ഷത വഹിച്ചു. ഈരാറ്റുപേട്ട ബ്ലോക്ക്‌ പഞ്ചായത്ത്‌ പ്രസിഡന്റ്‌ പ്രേംജി ആർ.,  പഞ്ചായത്ത്‌ വൈസ് പ്രസിഡന്റ്‌ ടെസ്സി ബിജു, വിദ്യാഭ്യാസ സ്റ്റാൻ്റിംഗ് കമ്മിറ്റി ചെയർപേഴ്സൺ ബിന്ദു സുരേന്ദ്രൻ, പഞ്ചായത്ത്‌ അംഗം അനിൽകുമാർ മഞ്ഞപ്ലാക്കൽ,  ഉപജില്ലാ വിദ്യാഭ്യാസ ഓഫീസർ ജോർജ് തോമസ്,  സ്കൂൾ പ്രിൻസിപ്പാൾ ബെന്നി തോമസ്, ഹെഡ്മാസ്റ്റർ ടോം കെ. എ., എൽ.പി. സ്കൂൾ ഹെഡ്മിസ്ട്രസ് ജെസ്സി അഗസ്റ്റിൻ, പി.റ്റി.എ. പ്രസിഡന്റ്‌ എം.സി. വർക്കി, മീനച്ചിൽ ഈസ്റ്റ്‌ അർബൻ ബാങ്ക് ചെയർമാൻ കെ എഫ് കുര്യൻ, എം.പി.റ്റി.എ. പ്രസിഡൻ്റ് ആഷാ ജോസ്, കൈറ്റ് പ്രതിനിധി ശ്രീകുമാർ പി.ആർ., ബി.ആർ.സി.  പ്രതിനിധി ജോബി ജോസഫ്, സി.ആർ.സി. കോ-ഓർഡിനേറ്റർ എലിസബത്ത് പി. മാത്യു,  അധ്യാപക പ്രതിനിധികളായ ബൈജു ജേക്കബ്ബ്, ജാൻസി തോമസ്,  ജോബിൻ കുരുവിള, ടോണി തോമസ് എന്നിവർ പങ്കെടുത്തു.

Sunday, October 4, 2020

പൂഞ്ഞാറിന്റെ പ്രിയപ്പെട്ട ജെയിംസച്ചന് യാത്രാമംഗളങ്ങള്‍..

      പൂഞ്ഞാര്‍ സെന്റ് ആന്റണീസ് സ്കൂള്‍ മാനേജരും ചെറുപുഷ്പാശ്രമ ദൈവാലയ പ്രിയോരുമായ ഫാ.ജെയിംസ് നീണ്ടൂശ്ശേരി സി.എം.ഐ., പൂഞ്ഞാറിലെ സ്തുത്യര്‍ഹമായ സേവനത്തിനുശേഷം, പുളിയന്മല ആശ്രമത്തിന്റെ പ്രിയോര്‍, ഇടവക വികാരി എന്നീ ഉത്തരവാദിത്വങ്ങള്‍ ഏറ്റെടുത്ത് സ്ഥലം മാറി പോകുകയാണ്. കഴിഞ്ഞ മൂന്നര വര്‍ഷക്കാലത്തെ തന്റെ സേവനത്തിലൂടെ സെന്റ് ആന്റണീസ് സ്കൂളിനും ആശ്രമത്തിനും നാടിനും നിരവധി നന്മകള്‍ സമ്മാനിച്ചാണ് അച്ചന്‍ പുതിയ കര്‍മ്മഭൂമിയിലേക്ക് യാത്രയാവുന്നത്. കുട്ടികള്‍ക്ക് കൂടുതല്‍ മികച്ച പഠനാന്തരീക്ഷം സൃഷ്ടിക്കാനായി, പൂഞ്ഞാര്‍ സെന്റ് ആന്റണീസ് സ്കൂളില്‍ നിരവധി പ്രവര്‍ത്തനങ്ങളാണ് കഴിഞ്ഞ വര്‍ഷങ്ങളില്‍ അച്ചന്‍ നടത്തിയത്. 
      ഗവണ്‍മെന്റ് സ്മാര്‍ട്ട് ക്ലാസ് റൂമിനുള്ള ഉപകരണങ്ങള്‍ നല്‍കിയപ്പോള്‍ , അതിനുള്ള ഏറ്റവും മികച്ച അടിസ്ഥാന സൗകര്യങ്ങള്‍ ഒരുക്കി 18 സ്മാര്‍ട്ട് ക്ലാസ് മുറികള്‍ തയ്യാറാക്കുന്നതിന് അച്ചന്‍ നേതൃത്വം നല്‍കി. സ്ഥലം മാറുന്ന സമയത്തും, ഹയര്‍ സെക്കന്‍ഡറി ബില്‍ഡിംഗിനോട് ചേര്‍ന്ന് ആണ്‍കുട്ടികള്‍ക്കായി ആധുനിക രീതിയിലുള്ള ടോയ്ലറ്റും അനുബന്ധ സൗകര്യങ്ങളും, കൊച്ചു കുട്ടികള്‍ക്കായി യു.പി. കെട്ടിടത്തോട് ചേര്‍ന്ന് പുതിയ ടാപ്പുകളും മറ്റ് സൗകര്യങ്ങളും നിര്‍മ്മിക്കുന്ന തിരക്കിലായിരുന്നു അച്ചന്‍. ക്ലാസ്മുറികളുടെ നവീകരണത്തിനൊപ്പം കുട്ടികളുടെ സുരക്ഷക്കായി ഇടിമിന്നല്‍ രക്ഷാ ചാലകം സ്ഥാപിക്കുകയും, മുറ്റത്തിനും ഗ്രീന്‍ഫീല്‍ഡ് സ്റ്റേഡിയത്തിനും ബാസ്കറ്റ് ബോള്‍ കോര്‍ട്ടിനും ചുറ്റുമതില്‍ നിര്‍മ്മിക്കുകയും ചെയ്തു. ഹൈസ്കൂള്‍ കംപ്യൂട്ടര്‍ ലാബ് അടുത്ത നാളില്‍ നവീകരിച്ചു നല്‍കി. ഹയര്‍ സെക്കന്‍ഡറി മാത്സ് ലാബ് തയ്യാറാക്കി. 
     ജെയിംസച്ചന്റെ പ്രത്യേക താത്പ്പര്യത്തിലും നേതൃത്വത്തിലുമാണ് രണ്ട് വര്‍ഷം മുന്‍പ് സ്കൂളിനായി പുതിയ ബസ് വാങ്ങിയത്. കൂടാതെ വിവിധ ഗവണ്‍മെന്റ് ഫണ്ടുകളുടെ സഹായത്തോടെ (MP-MLA-ജില്ലാ പഞ്ചായത്ത് ഫണ്ടുകള്‍) വിവിധ നിര്‍മ്മാണ പ്രവര്‍ത്തനങ്ങള്‍ക്കും നേതൃത്വം നല്‍കി. LP സ്കൂള്‍ കെട്ടിടത്തില്‍ പുതിയ പാചകപ്പുര, അവിടുത്തെ കൊച്ചുകുട്ടികള്‍ക്കായി പുതിയ മള്‍ട്ടിമീഡിയ റൂം, സ്കൂള്‍ മുറ്റവും പരിസരവും മനോഹരമാക്കി പുതിയ പാര്‍ക്ക്,.. തുടങ്ങിയ പദ്ധതികളും കോവി‍ഡ് അവധിക്കാലത്ത് പൂര്‍ത്തിയാക്കിക്കഴിഞ്ഞു. ഒരു നല്ല കലാകാരന്‍കൂടിയാണ് ജെയിംസച്ചന്‍. ആശ്രമ പരിസരത്ത് നിര്‍മ്മിച്ച മനോഹരമായ കവാടത്തിന്റെയും ചാവറ ഗ്രോട്ടോയുടെയും നിര്‍മ്മാണ വേളയില്‍, ശില്‍പ്പിക്കൊപ്പം ഗ്രോട്ടോയ്ക്ക് നിറം പകര്‍ന്ന അച്ചന്റെ കലാവാസന ജനശ്രദ്ധ നേടിയിരുന്നു. 

      രണ്ടുതവണ സി.എം.ഐ. പ്രൊവിന്‍ഷ്യല്‍ കൗണ്‍സില്‍ അംഗം, ദീപിക ബുക്ക് ഹൗസ് മാനേജര്‍, പാലാ സെന്റ് വിന്‍സെന്റ് സ്കൂള്‍ പ്രിന്‍സിപ്പാള്‍, പൂഞ്ഞാര്‍ സെന്റ് ആന്റണീസ്, ഇടമറ്റം കെ.റ്റി.ജെ.എം., പാലംബ്ര അസംപ്ഷന്‍ എന്നീ സ്കൂളുകളിലെ അധ്യാപകന്‍ എന്നീ നിലകളില്‍ സേവനം അനുഷ്ഠിച്ചുകഴിഞ്ഞ ജെയിംസ് നീണ്ടൂശ്ശേരി അച്ചന്‍ പുളിയന്മലയിലെ തന്റെ പുതിയ കര്‍മ്മ മണ്ഢലത്തിലേക്ക് യാത്രയാകുമ്പോള്‍, പൂഞ്ഞാര്‍ സെന്റ് ആന്റണീസ് കുടുംബത്തിന്റെയും പൂഞ്ഞാര്‍ ഗ്രാമത്തിന്റെയും ഹൃദയം നിറഞ്ഞ നന്ദിയും യാത്രാമംഗളങ്ങളും നേരുന്നു..

Monday, September 21, 2020

പൂഞ്ഞാറിൽ പെയ്യുന്ന മഴയുടെ അളവ് കൃത്യമായി രേഖപ്പെടുത്തി തുടങ്ങി..

(കഴിഞ്ഞ 48 മണിക്കൂറിൽ പൂഞ്ഞാറിൽ പെയ്ത മഴയുടെ അളവ് 66 mm)

പൂഞ്ഞാർ (21/09/20) : ജില്ലയുടെ പടിഞ്ഞാറൻ മേഖലയിലെ വെളളപ്പൊക്ക ഭീക്ഷണി നേരിടുവാനായി, കിഴക്കൻ മേഖലയിലെ മഴ - ജലനിരപ്പ് വിവരങ്ങൾ, മീനച്ചിൽ നദീസംരക്ഷണ സമിതിയുടെ 'സേവ് മീനച്ചിലാർ ' ഗ്രൂപ്പിൻ്റെ നേതൃത്വത്തിൽ ശേഖരിക്കുകയാണ്. പൂഞ്ഞാറിലെ വിവരങ്ങൾ നൽകാനുള്ള ചുമതല പൂഞ്ഞാർ സെൻ്റ് ആൻ്റണീസ് ഹയർ സെക്കൻ്ററി സ്കൂളിലെ Antonian Club ഏറ്റെടുത്ത് നിർവ്വഹിക്കുകയാണ്. മഴമാപിനി ഉപയോഗിച്ച് ഓരോ 12 മണിക്കൂറിലും ചെയ്യുന്ന മഴയുടെ അളവ് കൃത്യമായി രേഖപ്പെടുത്തുകയാണ് ചെയ്യുന്നത്. കഴിഞ്ഞ 48 മണിക്കൂറിൽ പൂഞ്ഞാറിൽ പെയ്ത മഴയുടെ അളവ് 66 mm ആണ്. വിശദ വിവരങ്ങൾ ചുവടെ..

Poonjar - 21/09/20, തിങ്കൾ, 7.45 am
ഇടവിട്ടു മാത്രം ശക്തമായ മഴ. അല്ലാത്തപ്പോൾ ചെറിയ മഴയോ തൂളലോ. ഇടക്ക് ചിലപ്പോൾ ചെറുതായി തെളിയും. ഉടൻ ഇരുണ്ടുമൂടി മഴയും എത്തും. ഇതാണ് കഴിഞ്ഞ 2 ദിവസമായി പൂഞ്ഞാറിലെ അവസ്ഥ. ഇങ്ങനെ മഴ പെയ്യുമ്പോൾ സ്വോഭാവികമായി എത്തുന്ന വെള്ളമേ മീനച്ചിലാറ്റിൽ ഉള്ളൂ. ഇപ്പോൾ പേടിക്കേണ്ട അവസ്ഥ ഒന്നുമില്ല. ഈ സമയത്തും (21/09/20, 7.45 am) മേൽ പറഞ്ഞ രീതിയിൽതന്നെ മഴ തുടരുന്നു.

കഴിഞ്ഞ 2 ദിവസത്തെ മഴ അളവ്
സെപ്റ്റംബർ 19, ശനി, 6 am - 6 pm  : 28.8 mm
സെപ്റ്റംബർ 19, ശനി, 6 pm - സെപ്റ്റംബർ 20, ഞായർ, 6 am : 9.2 mm
സെപ്റ്റംബർ 20, ഞായർ, 6 am - 6 pm  : 14.2 mm
സെപ്റ്റംബർ 20, ഞായർ, 6 pm - സെപ്റ്റംബർ 21, തിങ്കൾ, 6 am : 13.8 mm

കഴിഞ്ഞ 48 മണിക്കൂറിൽ പൂഞ്ഞാറിൽ പെയ്ത ആകെ മഴയുടെ അളവ് : 66 mm

Saturday, September 19, 2020

ജെയ്മോന്റെ നക്ഷത്രം ലോകം കീഴടക്കുന്നു..

     പൂഞ്ഞാർ സെന്റ് ആന്റണീസ് ഹയർ സെക്കന്ററി സ്കൂളിലെ ഓഫീസ് സ്റ്റാഫായ ജെയ്മോൻ നിർമ്മിച്ച ക്രിസ്മസ് സ്റ്റാർ, ലോകത്തിലെ ഏറ്റവും ഉയരം കൂടിയ ക്രിസ്മസ് നക്ഷത്രത്തിനുള്ള ഇന്ത്യൻ ബുക്ക് ഓഫ് റെക്കോർഡ്സിന്റെയും അറേബ്യൻ ബുക്ക് ഓഫ് വേൾഡ് റിക്കോർഡ്സിന്റെയും അംഗീകാരം കരസ്ഥമാക്കി. 108.9 അടി ഉയരമുള്ള നക്ഷത്രം കടുത്തുരുത്തി പൂഴിക്കോൽ സെന്റ് ആന്റണീസ് പള്ളിയിൽ 2019 ഡിസംബർ മാസമാണ് ഉയർത്തിയത്. ജി.ഐ. പൈപ്പും ക്ലോത്ത് ഫ്ലെക്സും ഉപയോഗിച്ച് നിർമ്മിച്ച കൂറ്റൻ നക്ഷത്രത്തിന് മൂന്നര ലക്ഷം രൂപയോളം ചെലവ് വന്നു. എർണാകുളത്തുനിന്ന് മൂന്ന് ക്രെയിനുകൾ എത്തിച്ചാണ് നക്ഷത്രം ഉയർത്തുകയും പിന്നീട് താഴ്ത്തുകയും ചെയ്തത്. 

        പൂഴിക്കോൽ ദേവാലയ അങ്കണത്തിൽ ചേർന്ന അനുമോദന യോഗത്തിൽ മോൻസ് ജോസഫ് എം.എൽ.എ. ജെയ്മോന് ഇന്ത്യൻ ബുക്ക് ഓഫ് റെക്കോർഡ്സിന്റെ പുരസ്കാരം കൈമാറി.

ഫാ.തോമസ് കിഴക്കേകൊല്ലിത്താനത്ത്, ഫാ. സ്കറിയ മോടിയിൽ, ഫാ. ടൈറ്റസ് തട്ടാമറ്റത്തിൽ, പഞ്ചായത്ത് വൈസ് പ്രസിഡന്റ് സാബു കുന്നേൽ, പഞ്ചായത്തംഗങ്ങളായ ജെസ്സി ലൂക്കോസ്, ബിജു കുര്യൻ, പൂഞ്ഞാർ സെന്റ് ആന്റണീസ് ഹയർ സെക്കൻഡറി സ്ക്കൂൾ പ്രിൻസിപ്പാൾ ബെന്നി തോമസ്, മുൻ പ്രിൻസിപ്പാൾ എ. ജെ. ജോസഫ്, മുൻ ഹെഡ്മാസ്റ്റർ ജോസ് ജോർജ് തുടങ്ങിയവർ ആശംസകൾ അർപ്പിച്ച് സംസാരിച്ചു.

        അറുന്നൂറ്റിമംഗലം കൊല്ലംക്കുഴിയിൽ പരേതരായ ജോസഫ് - റോസമ്മ ദമ്പതികളുടെ മകനായ ജയ്മോൻ ചെറുപ്പം മുതൽ തന്നെ നിരവധി കലാശില്പങ്ങളും കൗതുക വസ്തുക്കളും നിർമ്മിച്ച് ശ്രദ്ധേയനായ വ്യക്തിയാണ്. ഭാര്യ ജിൻസി. മകൻ സാം ക്രിസ്റ്റി ജെ.കെ.



Friday, September 18, 2020

കോവിഡ്കാലത്തും സേവന പ്രവർത്തനങ്ങളിൽ സജീവമായി പൂഞ്ഞാറിലെ യുവജനങ്ങൾ..

പൂഞ്ഞാർ : കോവിഡ് പ്രതിരോധ പ്രവർത്തനങ്ങൾക്കായി മുന്നിട്ടിറങ്ങിയ പൂഞ്ഞാറിലെ എസ്.എം.വൈ.എം. (സീറോ മലബാർ യൂത്ത് മൂവ്മെൻ്റ്) പ്രവർത്തകർ തങ്ങളുടെ നിസ്വാർത്ഥ സേവന പ്രവർത്തനങ്ങളിലൂടെ ശ്രദ്ധേയരായിരിക്കുകയാണ്. മരണത്തെ തുടർന്ന് കോവിഡ് സ്ഥിരീകരിച്ച പൂഞ്ഞാർ നിവാസിയുടെ സംസ്കാര ശുശ്രൂഷകളിൽ സഹകരിച്ചത് അവയിൽ ഒന്നു മാത്രം.
 
      കേരളത്തിൽ കോവിഡ് രോഗബാധ തുടങ്ങുന്ന സമയത്തു തന്നെ സെമിനാർ ഉൾപ്പെടെയുള്ള ബോധവത്ക്കരണ പ്രവർത്തനങ്ങളുമായി ഇവർ രംഗത്തെത്തിയിരുന്നു. പൂഞ്ഞാർ ഗവൺമെൻ്റ് ഹോമിയോ ആശുപത്രിയുമായി സഹകരിച്ച് പ്രദേശത്തെ ആളുകൾക്കായി പ്രതിരോധ മരുന്ന് വിതരണം നടത്തി. പൂഞ്ഞാറിലെയും ഈരാറ്റുപേട്ടയിലെയും ആരോഗ്യ പ്രവർത്തകർക്കും പോലീസ് സേനാംഗങ്ങൾക്കും സൗജന്യമായും പൊതുജനങ്ങൾക്ക്  മിതമായ നിരക്കിലും  രണ്ടായിരത്തിൽപരം മാസ്കുകളാണ് ഇവർ നിർമ്മിച്ചു നൽകിയത്. ഇതു കൂടാതെ, ഹാൻഡ് വാഷും ലോഷനും നിർമ്മിച്ച് വിതരണം ചെയ്തിരുന്നു.
 
     ഓണാഘോഷത്തിനായി കരുതിയ തുക മണിയംകുളം രക്ഷാഭവനിലെ അന്തേവാസികൾക്കായി നൽകിയ എസ്.എം.വൈ.എം. പ്രവർത്തകർ, സർക്കാരിൻ്റെ ഓണക്കിറ്റ് വിതരണത്തിലും സഹായഹസ്തവുമായി എത്തിയിരുന്നു. സപ്ലൈക്കോയിൽ നിന്ന് കിറ്റുകൾ പൂഞ്ഞാർ തെക്കേക്കരയിലെ വിവിധ റേഷൻ കടകളിൽ എത്തിച്ചു നൽകിയത് ഇവരാണ്. കോവിഡ് ഭീതിമൂലം രക്തദാനം വളരെ കുറഞ്ഞപ്പോൾ, പാലാ പ്രദേശത്തെ ബ്ലഡ് ബാങ്കുകളിൽ രക്തം ദാനം ചെയ്യാൻ പൂഞ്ഞാറിൽ നിന്ന് യുവജനങ്ങൾ എത്തി.
 
      കോവിഡ് മാനദണ്ഡങ്ങൾ പാലിച്ചുകൊണ്ട്, വിവിധ സംഘടനകളുമായി സഹകരിച്ച് പച്ചക്കറി തൈകളുടെയും വൃക്ഷത്തൈകളുടെയും വിതരണം നടത്തുകയും, പ്രകൃതിക്ഷോഭത്താലും രോഗത്താലും ദുരിതമനുഭവിച്ച ചെല്ലാനം നിവാസികൾക്ക് സഹായമെത്തിക്കുകയും ചെയ്തു. കോവിഡ് ഭീതിമൂലം ഉണ്ടാകാവുന്ന മാനസിക സംഘർഷങ്ങൾ കുറയ്ക്കാൻ, കുട്ടികൾക്കും മുതിർന്നവർക്കുമായി ഓൺലൈനിൽ നിരവധി മത്സരങ്ങൾ സംഘടിപ്പിക്കാനും ഇവർ മറന്നില്ല.
 
      എസ്.എം.വൈ.എം. പൂഞ്ഞാർ മേഖലാ ഡയറക്ടർ ഫാ. ജോൺ കുറ്റാരപ്പള്ളിൽ, വൈസ് ഡയറക്ടർ സി. ജോയ്സി എഫ്.സി.സി., യൂണിറ്റ് പ്രസിഡൻ്റുമാരായ റ്റിജോ വെള്ളേടത്ത്, ലിയാ ജോയി എന്നിവരുടെ നേതൃത്വത്തിൽ ഒരു പറ്റം യുവജനങ്ങളാണ് ഏവരുടെയും പ്രശംസ പിടിച്ചുപറ്റിക്കഴിഞ്ഞ ഈ സേവന പ്രവർത്തനങ്ങളിൽ സജീവമായിട്ടുള്ളത്. ഇവർ നടത്തുന്ന കോവിഡ് പ്രതിരോധ മരുന്നുവിതരണത്തിൻ്റെ രണ്ടാം ഘട്ടം ഇന്ന് (സെപ്റ്റംബർ 18) പൂഞ്ഞാറിൽ നടക്കും.
                                    ഫയല്‍ ചിത്രം



പൂഞ്ഞാർ തെക്കേക്കരയിൽ ഇന്ന് ആൻ്റിജൻ ടെസ്റ്റ്..

ആരോഗ്യ വകുപ്പിൻ്റെ നേതൃത്വത്തിൽ പൂഞ്ഞാർ തെക്കേക്കര PHC-യിൽ ഇന്ന് (സെപ്റ്റംബർ 18 )  കോവിഡ് രോഗനിർണ്ണയത്തിനായുള്ള ആൻ്റിജൻ പരിശോധന നടക്കും. രോഗം സ്ഥിരീകരിച്ചവരുമായി പ്രഥമ - ദ്വിതീയ സമ്പർക്കപ്പട്ടികയിൽ വന്നവർ ഉദ്യോഗസ്ഥരുമായി ഫോണിൽ ബന്ധപ്പെടണം. എന്തെങ്കിലും രോഗലക്ഷണങ്ങൾ ഉള്ളവരും വിളിക്കുക.  ഫോൺ : 9539322314 . പരിശോധന ഇന്ന് രാവിലെ 11-ന് ആരംഭിക്കും. ബുക്ക് ചെയ്തവർക്കാണ് ഇന്ന് അവസരം നൽകുക. കൂടുതൽ ആളുകൾ ഉണ്ടെങ്കിൽ അവർക്ക്, ഇടമറുക്, പാലാ തുടങ്ങിയ സ്ഥലങ്ങളിൽ ഉടൻ പരിശോധന നടത്താനുള്ള സൗകര്യം ചെയ്തു കൊടുക്കുമെന്ന് ഹെൽത്ത് ഇൻസ്പെക്ടർ സിൽബി ജോസഫ് അറിയിച്ചു. വാർഡ് മെമ്പർമാരെയോ പ്രദേശത്തെ ആശ വർക്കർമാരെയോ ഫോണിൽ ബന്ധപ്പെട്ടും പരിശോധനക്കായി ബുക്ക് ചെയ്യാം.

http://poonjarblog.blogspot.com

Monday, September 14, 2020

കണ്ടെയിൻമെൻ്റ് സോണിൽനിന്ന് ഒഴിവായെങ്കിലും ജാഗ്രത തുടരാം..


 #poonjartowncontainmentzone എന്ന ഹാഷ് ടാഗ് ഇനി ഉപയോഗിക്കാൻ ഇടവരാതിരിക്കട്ടെ. പൂഞ്ഞാർ തെക്കേക്കര ഒന്നാം വാർഡിനെ കണ്ടെയിൻമെൻ്റ് സോണിൽനിന്ന് ഒഴിവാക്കി. അലസത ഒട്ടും വേണ്ട. ജാഗ്രത തുടരാം. നമ്മുടെ നാടിൻ്റെ നന്മക്കായി..

Sunday, September 13, 2020

ഹയർ സെക്കൻഡറി പ്ലസ് വൺ ഏകജാലക പ്രവേശനം : ആദ്യ അലോട്ട്മെന്റ് ഫലം പ്രസിദ്ധീകരിച്ചു.. നാളെ മുതൽ അഡ്മിഷൻ ആരംഭിക്കും..

HSCAP പോർട്ടലിൽ പ്രവേശിച്ച് Candidate Login നടത്തി അലോട്ട്മെന്റ്  ഫലം പരിശോധിക്കാം.


https://www.hscap.kerala.gov.in/


യൂസർ നെയ്മും പാസ് വേർഡും നൽകി ലോഗിൻ ചെയ്യുമ്പോൾ, നിങ്ങൾക്ക് അഡ്മിഷൻ ലഭിച്ചോ എന്ന കാര്യവും, ലഭിച്ചെങ്കിൽ അഡ്മിഷൻ ഡേറ്റും ടൈമും ഉൾപ്പെടെ അവിടെ കാണാം. അതിനു ചുവടെയുള്ള First Allot Results എന്ന ലിങ്കിൽ ക്ലിക്ക് ചെയ്യുമ്പോൾ അടുത്ത പേജിലെത്തി മറ്റ് വിശദ വിവരങ്ങൾ അറിയാം. അലോട്ട്മെൻ്റ് ലഭിച്ച സ്കൂളിൻ്റെ പേരും കോഴ്‌സ് ഡീറ്റെയിൽസും അവിടെയുണ്ട്. 

Print Allotment Slip -ൽ ക്ലിക്ക് ചെയ്താൽ നിങ്ങൾക്കുള്ള അലോട്ട്മെൻ്റ് സ്ലിപ്പ് കാണാം. 


പ്രവേശന സമയത്ത് നൽകേണ്ട രേഖകൾ..

ക്യാൻഡിഡേറ്റ് ലോഗിൻ ചെയ്യുമ്പോൾ ലഭിക്കുന്ന രണ്ട് പേജുള്ള അലോട്ട്മെന്റ് സ്ലിപ്പ് (പ്രവേശനം ലഭിക്കുന്ന സ്കൂളിൽനിന്ന് അഡ്മിഷൻ സമയത്ത് ഇത് നൽകും, സ്വന്തമായി പ്രിൻ്റ് എടുക്കേണ്ട ആവശ്യമില്ല. ), SSLC മാർക്ക് ലിസ്റ്റിൻ്റെ കോപ്പി, TC, സ്വഭാവ സർട്ടിഫിക്കറ്റ്,  പ്രത്യേക ബോണസ് പോയിൻ്റുകൾ ലഭിച്ചിട്ടുണ്ടെങ്കിൽ അവയുടെ രേഖകൾ എന്നിവ പ്രവേശന സമയത്ത് ഹാജരാക്കണം. അടക്കേണ്ട ഫീസിനെ സംബന്ധിച്ച വിവരം അലോട്ട്മെന്റ് സ്ലിപ്പിൽ ലഭ്യമാണ്. 


താത്കാലിക പ്രവേശനവും, സ്ഥിര പ്രവേശനവും

ഏകജാലക അപേക്ഷയിൽ നൽകിയ ഒന്നാം ഓപ്‌ഷൻ തന്നെ അലോട്ട്മെന്റിൽ ലഭിച്ചെങ്കിൽ ഫീസടച്ച് സ്ഥിര പ്രവേശനം നേടണം.  ഒന്നാം ഓപ്‌ഷൻ ലഭിക്കാത്തവർക്ക് മറ്റ് ഓപ്‌ഷനുകൾ ലഭിച്ചിട്ടുണ്ടെങ്കിൽ ഇപ്പോൾ താത്കാലിക പ്രവേശനം നേടിക്കൊണ്ട് അടുത്ത അലോട്ട്മെന്റിൽ ഉയർന്ന ഓപ്‌ഷൻ ലഭിക്കുമോ എന്ന് കാത്തിരിക്കാം. ഒന്നാം ഓപ്‌ഷൻ ലഭിക്കാത്തവർക്ക് വേണമെങ്കിൽ ഉയർന്ന ഓപ്‌ഷനുകൾ റദ്ദ് ചെയ്ത് ഇപ്പോൾ ലഭിച്ച ഓപ്‌ഷനിൽ സ്ഥിര പ്രവേശനവും നേടാം. താത്കാലിക പ്രവേശനം നേടുന്നവര്‍ക്ക് ആവശ്യമെങ്കില്‍ തെരഞ്ഞെടുത്ത ഏതാനും ഉയര്‍ന്ന ഓപ്ഷനുകള്‍ മാത്രമായി റദ്ദാക്കുകയും ചെയ്യാം. താത്കാലിക പ്രവേശനം നേടുമ്പോൾ ഫീസ് അടക്കേണ്ടതില്ല. പക്ഷേ, സർട്ടിഫിക്കറ്റുകൾ സ്‌കൂളിൽ നൽകണം. 


പ്രത്യേകം ശ്രദ്ധിക്കുക :

ഏതെങ്കിലും സ്കൂളിൽ മാനേജ്മെൻ്റ് ക്വോട്ടായിലോ കമ്മൂണിറ്റി ക്വോട്ടായിലോ പ്രവേശനം ലഭിക്കുമെന്ന് നിങ്ങൾക്ക് ഉറപ്പുണ്ടെങ്കിൽപോലും, നിർബന്ധമായും ഇപ്പോഴുള്ള അലോട്ട്മെൻ്റിൽ താത്ക്കാലിക പ്രവേശനം നേടണം. 

അലോട്ട്‌മെന്റ് ലഭിച്ചിട്ടും പ്രവേശനം നേടാതിരിക്കുന്ന വിദ്യാര്‍ത്ഥികളെ തുടര്‍ന്നുളള അലോട്ട്‌മെന്റുകളില്‍ പരിഗണിക്കില്ല. 


ആദ്യ അലോട്ട്മെന്റിൽ പ്രവേശനം ലഭിക്കാത്തവർ..

ഏകജാലക പ്രവേശന പ്രക്രിയയിൽ ആദ്യ ഘട്ടത്തിൽ രണ്ട് അലോട്ട്മെന്റ് ഉണ്ട്. ഇപ്പോൾ അലോട്ട്മെന്റ് ലഭിക്കാത്തവർ രണ്ടാം അലോട്ട്മെന്റ് പ്രസിദ്ധീകരിക്കുന്നതിനായി കാത്തിരിക്കുക.


Saturday, September 12, 2020

പൂഞ്ഞാർ ടൗൺ വാർഡ് കണ്ടെയിൻമെൻ്റ് സോണായി തുടരുന്നു..


ഇന്ന് (12/09/2020) പൂഞ്ഞാർ ടൗണിലെ മെഡിക്കൽ സ്‌റ്റോർ സ്റ്റാഫിന് കോവിഡ് സ്ഥിരീകരിച്ചെങ്കിലും സമ്പർക്ക രോഗവ്യാപന സാധ്യത വളരെ കുറവാണെന്നാണ് കരുതപ്പെടുന്നത്. സെപ്റ്റംബർ 5-ന്, പൂഞ്ഞാർ ടൗൺ ഭാഗം കണ്ടെയിൻമെൻ്റ് സോൺ ആയതുമുതൽ സ്റ്റാഫ് അവധിയിൽ ആയിരുന്നു. ഇന്ന് കോവിഡ് സ്ഥിരീകരിച്ച ഈ സ്റ്റാഫ് കഴിഞ്ഞ ഏഴു ദിവസവും കടയിൽ വന്നിട്ടില്ല എന്നതാണ്  സമ്പർക്ക രോഗവ്യാപന സാധ്യത കുറവാണെന്ന് കരുതപ്പെടാൻ കാരണം.

അതേസമയം, ടൗൺ വാർഡ് കണ്ടെയിൻമെൻ്റ് സോണായി തുടരുകയാണ്. പ്രദേശത്ത് കൂടുതൽ രോഗവ്യാപനം ഉണ്ടായില്ലെങ്കിൽ അടുത്ത ആഴ്ച്ചയോടെ കണ്ടെയിൻമെൻ്റ് സോണിൽനിന്ന് ഒഴിവാക്കിയേക്കും.

Tuesday, September 8, 2020

കണ്ടെയിൻമെൻ്റ് സോണുകളിൽ ജില്ലാ കളക്ടർ അനുവദിക്കുന്ന ഇളവുകൾ നാളെ മുതൽ പൂഞ്ഞാർ ടൗൺ വാർഡിൽ..

പൂഞ്ഞാർ ടൗൺ ഒന്നാം വാർഡിൽ നാളെ മുതലുള്ള (സെപ്റ്റംബർ 9, ബുധൻ) ഇളവുകൾ : കണ്ടെയിൻമെൻ്റ് സോണുകളിൽ ജില്ലാ കളക്ടർ അനുവദിക്കുന്ന ഇളവുകൾ നാളെ മുതൽ പൂഞ്ഞാർ ടൗൺ വാർഡിൽ ഉണ്ടായിരിക്കും.  

അവശ്യവസ്തുക്കൾ വിൽക്കുന്ന കടകൾക്ക് (പലചരക്ക്, ബേക്കറി, പച്ചക്കറി, കോൾഡ് സ്റ്റോറേജ്,..) രാവിലെ 7 മുതൽ ഉച്ചകഴിഞ്ഞ് 2 വരെ പ്രവർത്തിക്കാം. ഹോട്ടലുകളിൽ പാഴ്സൽ സർവ്വീസ് മാത്രം അനുവദിക്കും. ബാങ്ക് ഉൾപ്പെടെയുള്ള എല്ലാ സ്ഥാപനങ്ങളും ഉച്ചകഴിഞ്ഞ് 2-ന് അടക്കും. 

എന്നാൽ, ഇളവുകൾ ഉണ്ടെങ്കിലും, കണ്ടെയിൽമെൻ്റ് സോണിൽ താമസിക്കുന്നവർ ആ ഭാഗത്തെ വോളണ്ടിയർമാരെ വിവരമറിയിച്ച്, അവർ മുഖേന മാത്രം, പണം നൽകി അവശ്യ സാധനങ്ങൾ വാങ്ങിക്കണമെന്നും കണ്ടെയ്ൻമെൻ്റ് സോണിൻ്റെ കാലാവധി അവസാനിച്ചതായി ജില്ലാ കലക്ടർ പ്രഖ്യാപിക്കുന്നതു വരെ എല്ലാവരും അവരുടെ വീടുകളിൽ കഴിയേണ്ടതാണെന്നും വാർഡുമെമ്പറും പഞ്ചായത്ത് വൈസ് പ്രസിഡൻ്റുമായ ടെസ്സി ബിജു അറിയിച്ചു. ആശുപത്രി ആവശ്യങ്ങൾക്കല്ലാതെ പുറത്തിറങ്ങി നടക്കുകയോ മറ്റുള്ളവരുമായി സമ്പർക്കത്തിൽ ഏർപ്പെടുകയോ ചെയ്യാൻ പാടില്ല. 

ഒന്നാം വാർഡിലുള്ള ആർക്കെങ്കിലും അടിയന്തര സഹായം ആവശ്യമായി വന്നാൽ ചുവടെയുള്ള നമ്പരുകളിൽ ബന്ധപ്പെടേണ്ടതാണ്.

9539093647

9656647851

8075499895

9497821900 

ഇന്ന് പൂഞ്ഞാർ ടൗണിൽ അണുനശീകരണം നടത്തിയിരുന്നു. അതേ സമയം, പഞ്ചായത്തിൻ്റെ പല ഭാഗങ്ങളിലും കോവിഡ് പോസിറ്റീവ് സ്ഥിരീകരിക്കുന്നതിനാൽ ജനങ്ങൾ വളരെ ജാഗ്രത പുലർത്തണമെന്നും അധികൃതർ അറിയിച്ചു.